नेकपा माओवादी केन्द्र (समाजवादी)ले एमसीसी खारेजका लागि दबाब दिन हस्ताक्षर अभियान सञ्चालन गर्ने भएको छ ।

कर्णजित बुढाथोकी नेतृत्वको पार्टीले मंगलबार रिपोर्टर्स क्लब नेपालमा पत्रकार सम्मेलन गर्दै सो पार्टीले राष्ट्रघाती एमसीसी सम्झौता संसदबाट जबरजस्ती पास गरेमा कडा जनसंघर्षमा उत्रिने चेतावनीसमेत दिएको छ ।

एमसीसी सम्झौता विरुद्ध जनप्रदर्शन, धर्ना, घेराउ, आमसभा सञ्चालन गर्दै आइरहेको नेकपा माओवादी केन्द्र समाजवादीले मंसिर २३ गतेबाट ७ वटै प्रदेशमा हस्ताक्षर संकलन अभियान संचालन गर्ने भएको छ ।

उनले एमसीसी पास गर्न हुन्न भन्ने पक्षमा आफ्नो पार्टीले लाखौं जनताको हस्ताक्षर संकलन गर्न लागेको समेत जानकारी दिए ।

पत्रकार सम्मेलनमा सो पार्टीका अध्यक्ष कर्णजित बुढाथोकीले नेपाल र नेपाली जनताको हितमा एमससी सम्झौता नभएको स्पष्ट पारे । उनले सम्झौता नेपालको परराष्ट्र नीतीको विरुद्धमा भएको पनि जिकिर गरे ।

बुढाथोकीले भोलि हुने पश्चातापलाई आजै महसुस गरी सम्झौता खारेज गर्नुपर्नेमा जोड दिए । जटिल र संवेदनशील राजनीतिक घटनाक्रमलाई मध्यनजर गर्दै राष्ट्रघाती एमसीसी सम्झौता लागु नगर्न जोडदार माग गर्नुको विकल्प नरहेको उनको भनाइ थियो ।

उनले जबरजस्ती संसदबाट एमसीसी सम्झौता पास गराएको खण्डमा कडा जनसंघर्षमा उत्रिन बाध्य हुने चेतावनी दिए ।

२१ मंसिर २०७८, मंगलवार १६:५३ बजे प्रकाशित