नेपाली सेनाको चितवनस्थित महेन्द्र दल गणबाट(एसएमजी) हतियार चोरी गरेको आरोपमा कैद भुक्तान गरिरहेका दुई सैनिक शुक्रबार रिहा भएका छन् ।

सैनिक विशेष अदालतले अमल्दार लव कुमार गुरुङ्ग र सिपाही सरोज तामाङलाई थुनामुक्त गर्न आदेश दिएपछि उनीहरु रिहा भएका हुन् ।२०७५ पुसमा सैनिक ब्यारेकबाटै (सर्ट मेसिन गन) चोरी गरेको आरोपमा उनीहरु पक्राउ परेका थिए ।

सैनिक विशेष अदालतले उनीहरुलाई तीन वर्षसम्म पदोन्नतिमा रोक्का गर्नुको साथै साविककै दर्जामा पुनवर्हाली गर्ने फैसला गरेको छ । उनीहरु आजदेखि सेवामा फर्किएका छन् ।

दुई सैनिकले चोरेको भनिएको हतियार महेन्द्र दल गणमा कार्यरत सैनिक जवान गंगाधर ढकालले चोरी गरी साथीको हत्यामा प्रयोग गरेका थिए ।

ढकालले आफ्नै गणमा कार्यरत साथी भरत गुरुङको हत्या गरेका थिए । सैनिक अदालतले उनलाई जन्मकैदको सजाय तोकिसकेको छ ।

१८ भदौ २०७८, शुक्रवार १८:३२ बजे प्रकाशित