काठमाडौँमा जातका आधारमा कोठा भाडा नदिइएको भन्दै मकवानपुरमा दलित अधिकारवादी सङ्घसंस्थाले रुपा सुनारको न्यायका लागि दबाब सिर्जना गर्ने भएका छन् ।

रुपाको न्यायका लागि मकवानपुरमा  बुधबार र बिहिबार विरोध कार्यक्रम हुने भएको छ ।

जिल्लामा असार २१ गतेसम्म निषेधाज्ञा जारी भए पनि निषेधाज्ञामै विरोधका कार्यक्रम गर्ने दलित अधिकारकर्मी सुधन विश्वकर्माले बताए । सुनारले न्याय नपाएसम्म विरोध कार्यक्रम जारी रहने उनले बताए ।

मकवानपुरमा क्रियाशील १० दलित अधिकारवादी सङ्घसंस्थाले रुपा सुनारको कोठाभाडा विषयमा उचित छानबिन गरी न्याय प्रदान गर्न प्रमुख जिल्ला अधिकारीमार्फत प्रधानमन्त्री केपी शर्मा ओलीलाई ध्यानाकर्षण गराएका छन् ।

सोमबार मकवानपुरका प्रमुख जिल्ला अधिकारी पाण्डेमार्फत जिल्लाका १० वटा दलित अधिकारवादी सङ्घसंस्थाले संयुक्त रूपमा प्रधानमन्त्रीलाई ध्यनाकर्षण गराएका हुन् ।

१५ असार २०७८, मंगलवार ११:४३ बजे प्रकाशित