धनगढी। चार महिनादेखि अवरुद्ध भएको दुग्ध विकास संस्थान (डीडीसी) अत्तरिया कार्यालयको गतिविधि पुनः सञ्चालनमा आएको छ। जेठ ८ गतेदेखि स्थानीयको विरोधका कारण लगाइएको तालाबन्दी मंगलबार हटेपछि आज (बुधबार) बाट किसानलाई दूधको भुक्तानी सुरु गरिएको छ।

डीडीसी अत्तरियाका प्रमुख निरञ्जन भट्टराईका अनुसार पहिलो चरणमा करिब डेढ करोड रुपैयाँ किसानलाई भुक्तानी गरिनेछ। उनले बिदाको दिन परे पनि भुक्तानीको काम रोकिने छैन भन्दै माघ महिनादेखि बाँकी रहेको करिब साढे ६ करोड रकम क्रमशः भुक्तानी गरिने जानकारी दिए।

हाल डीडीसीले कैलाली, कञ्चनपुर र डडेल्धुराबाट ५९ सहकारी, समूह तथा फार्ममार्फत दूध संकलन गर्दै आएको छ। अत्तरियामा वैशाखदेखि असोजसम्म दैनिक २ हजार ५ सयदेखि ३ हजार लिटर दूध संकलन हुने र कार्तिकदेखि चैतसम्म दैनिक ६,५०० लिटरभन्दा बढी दूध संकलन हुने गरेको छ।

डीडीसीलाई धनगढी सार्ने निर्णयको विरोधमा स्थानीयले तालाबन्दी गरेका थिए। तर, केन्द्रीय कार्यालयले तत्काल स्थानान्तरण नगर्ने आश्वासनसहित पत्र पठाएपछि सर्वदलीय सर्वपक्षीय बैठकले तालाबन्दी खोल्ने सहमति गरेको हो। बैठकमा गोदावरी नगर प्रमुख, डीडीसी व्यवस्थापक, संघर्ष समिति, राजनीतिक दलका प्रतिनिधि र स्थानीयको सहभागिता थियो।

संघर्ष समितिका संयोजक लोक राज पाण्डेका अनुसार बैठकले दसैँअघि किसानको सम्पूर्ण भुक्तानी गर्ने र गोदावरी नगरपालिकाले डीडीसीको दीर्घकालीन व्यवस्थापनका लागि आवश्यक जग्गा उपलब्ध गराउने निर्णय गरेको छ।

१ असोज २०८२, बुधवार १४:०५ बजे प्रकाशित