सुदूरपश्चिम प्रदेश सरकार गठन भएको दुई साता बितिसक्दा पनि अहिले सम्म मन्त्रिमण्डलले पूर्णता पाउन सकेको छैन । गत २८ पुसमा मुख्यमन्त्री रावलसँगै शपथ ग्रहण गरेका दुई जना बिना विभागीय मन्त्रीको मन्त्रालयसमेत अझै टुङ्गो लागेको छैन ।

सत्ता पक्षको बहुमतमा निर्णायक रहेको नागरिक उन्मुक्ति पार्टीले सरकारमा सहभागिता र विश्वासको मतका लागि आफ्ना माग सुनुवाइको प्रक्रिया सुरु हुनुपर्ने सर्त राखेपछि मुख्यमन्त्री रावलले प्रदेश सभाबाट न विश्वासको मत न मन्त्रिमण्डल विस्तार गर्न सकेका छैनन् । नेकपा माओवादी केन्द्रका संसदीय दलका नेता खगराज भट्ट र आफ्नो पार्टी नेकपा एमाले संसदीय दलका उपनेता सन्तोष शर्मा थापाले मुख्यमन्त्रीले शपथ गरेसँगै विना विभागीय मन्त्रीमा शपथ लिएका थिए । तर, नागरिक उन्मुक्तिसँग सहमति हुन नसकेकाले मन्त्रीको मन्त्रालयसमेत तोकिएको छैन ।

नियुक्त मन्त्रीको जिम्मेवारी नतोकिँदा र मन्त्रिमण्डल विस्तार नहुँदा सबै मन्त्रालयको जिम्मेवारी अहिले मुख्यमन्त्रीसँगै छ । नागरिक उन्मुक्तिले टीकापुर घटनामा जेल जीवन बिताइरहेका पार्टीका संरक्षक रेमश चौधरीसहित अन्य छ जनालाई रिहाइ गर्नुपर्ने माग गर्दै आएको छ ।

मुख्यमन्त्रीमा दाबी पेस गर्दा तथा सभामुख र उपसभामुखको निर्वाचनमा सत्ता पक्षलाई समर्थन गरेको उसले विश्वासको मत दिनु पूर्व आफ्ना माग सुनुवाइको प्रक्रिया सुरु हुनुपर्ने सर्त राखेको छ । माग सम्बोधनको प्रक्रिया सुरु भए मात्र मुख्यमन्त्रीलाई विश्वासको मत दिने भनेर सत्ता पक्षलाई भनिएको नागरिक उन्मुक्ति पार्टीको संसदीय दलका नेता रामेश्वर चौधरीले बताए ।

‘सरकार गठन र सभामुख, उपसभामुखको निर्वाचनमा हामीले काँध थापेका छौँ । अब हाम्रा मागमा केही गर्ने पालो सत्ता पक्षको हो,’ चौधरीले भने, ‘टीकापुर घटनाका बन्दीको रिहाइको कुनै न कुनै प्रक्रिया सुरु गरे विश्वासको मत दिन र सरकारमा जान हामी तयार छौँ । हाम्रा माग सुनुवाइ नभए हामी समर्थन गर्न सक्दैनौँ ।’

सरकारमा जानकै लागि समर्थन गरिएको भन्दै उनले त्यस पहिले माग पूरा हुने प्रक्रिया सुरु हुनुपर्ने बताए । सरकारलाई बहुमत पु¥याउन निर्णायक रहेको नागरिक उन्मुक्ति पार्टीसँग सत्ता पक्षको ठोस सहमति नहुँदा मुख्यमन्त्रीले विश्वासको मत लिन नसकेका हुन् ।

६ वटै प्रदेशमा मुख्यमन्त्रीले विश्वासको मत लिइसक्दा सुदूरपश्चिमका मुख्यमन्त्री रावल भने विश्वासको मत पाउने सुनिश्चितता खोज्न केही दिन काठमाडौँ बसेर बिहीबार फर्केका छन् । काठमाडौँ रहेकाले उनी गत साता प्रदेश सभाको स्थापना दिवसमा समेत सहभागी भएनन् । नागरिक उन्मुक्तिले विश्वासको मत दिने सुनिश्चितताका लागि मुख्यमन्त्री रावलले काठमाडौँमा नागरिक उन्मुक्तिसहित गठबन्धनका शीर्ष नेतासँग भेटघाट गरेका हुन् ।

उनले नागरिक उन्मुक्ति पार्टीका सांसद लिएर काठमाडौँमा प्रधानमन्त्री पुष्पकमल दाहाल प्रचण्ड, एमाले अध्यक्ष केपी ओलीलगायत नेताहरूसँग छलफल गरेका छन् । तर छलफल सकारात्मक भए पनि सरकारलाई विश्वासको मत दिनेबारे सहमति भइनसकेको नागरिक उन्मुक्तिले जनाएको छ ।

१३ माघ २०७९, शुक्रवार १८:१२ बजे प्रकाशित