सुदूरपश्चिम प्रदेश एमाले संसदीय दलले प्रदेश सरकारलाई दिएको समर्थन फिर्ता नलिने निर्णय गरेपछि पार्टी प्रदेश अध्यक्ष कर्ण थापाले केन्द्रको निर्णय नमान्ने सांसदलाई कारबाही गर्ने चेतावनी दिएका छन् ।

केन्द्रको निर्णय नमान्नेलाई पार्टीको साधारण सदस्यबाटै निष्कासन गर्ने उनले दाबी गरे । पार्टीका तीनजना मन्त्रीलाई राजीनामा दिन निर्देशन भइसकेको बताउँदै उनले भने, ‘निर्देशन विपरीत निर्णय गरेको भन्ने सुन्नमा आएको छ । अब कारबाही प्रक्रिया अघि बढाउँछौँ ।’

एमाले स्थायी कमिटी बैठकले सुदूरपश्चिम प्रदेश सरकारलाई दिएको समर्थन फिर्ता लिने निर्णय गरेको थियो । एमालेबाट निर्वाचित सरकारमा सहभागी मन्त्रीहरूलाई २४ घण्टाभित्र सरकारबाट फिर्ता आउन आग्रह गरिएको थियो ।

तर, सुदूरपश्चिममा उक्त निर्णय कार्यान्वयन हुन सकेन । एमाले संसदीय दलको बैठकले सरकारबाट बाहिर नफर्किने निर्णय गरेपछि ओलीलाई चुनौती देखिएको छ।

प्रदेश सरकारमा एमालेका तर्फबाट आन्तरिक मामिला तथा कानुनमन्त्री प्रकाश बहादुर शाह, सामाजिक विकासमन्त्री कृष्णराज सुवेदी र उद्योग वन तथा वातावरणमन्त्री माया भट्ट छन् ।

आन्तरिक मामिला तथा कानुनमन्त्री शाहलाई आर्थिक मामिला तथा योजना मन्त्रालयको समेत जिम्मेवारी दिइएको छ । गत चैत १५ गते नै नेकपा एमालेको प्रदेश कमिटी बैठकले पनि प्रदेश सरकारबाट एमाले बाहिरिने निर्णय गरेको थियो ।

सभामुख अर्जुन थापासहित प्रदेश सभामा एमालेका जम्मा २५ जना सांसद छन् । जसमा माधव पक्षमा १९ जना सांसद छन् ।

१२ जेठ २०७८, बुधवार १७:५९ बजे प्रकाशित