उद्घाटन नहुँदै खरानी बन्यो करोडौं लगानीको फर्निचर उद्योग
धनगढीमा करोडौं लगानीमा सञ्चालनमा आउन लागेको फर्निचर उद्योगमा आगलागी हुँदा क्षणभरमै खरानी बनेको छ ।
यसै महिनाभित्रै उद्घाटन गर्ने तयारीमा रहेको चटकपुरस्थित आलोक मल्टी कन्सर्नमा शनिबार भीषण आगलागी हुँदा उद्योग जलेर क्षणभरमै खरानी भएको हो ।
आगलागी भएपछि समयमै दमकल नआउँदा उद्योग ध्वस्त हुनपुगेको हो । आगलागी भएलगत्तै स्थानीयले दमकललाई खबर गरेपनि समयमा दमकल आउन सकेन । आगो लागेको करिब पौने घण्टापछि मात्रै केही मात्रामा पानी लिएर दमकल घटनास्थल पुगेको थियो ।
चार किलोमिटरको दुरीमा रहेको धनगढी उपमहानरपालिकाको दमकल भन्दा अगाडि गोदावरी नगरपालिकाको दमकल आगो निभाउन पुगेको थियो । धनगढी उपमहानगरपालिकाको दुईवटा दमकल, गोदावरीको एउटा कञ्चनपुरको पुनर्वास नगरपालिकाको एउटा दमकल, जनपथ प्रहरी, सशस्त्र प्रहरी, नेपाली सेना र स्थानीयको सहयोगमा दुई घण्टापछि आगो नियन्त्रणमा आएको थियो ।
आगो नियन्त्रणका लागि घोडाघोडी नगरपालिकाबाट पनि दमकल आएको थियो । तर, धनगढी नपुग्दै आगो नियन्त्रणमा आइसकेको थियो । आगलागी भएको स्थानबाट नेपाल आयल निगमको डिपो करिब १०० मिटरको दुरीमा मात्रै रहेको छ । यदि आलय निगमसम्म आगो पुग्न सकेको भए अवस्था भयावह हुनसक्ने स्थानीय बताउँछन् ।
आगलागीबाट ठूलो क्षति भएको छ तर यकिन नभइसकेको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक प्रतीक विष्टले बताए । घटनाको विवरण संकलन भइरहेको उनले बताए ।
स्थानीयकाअनुसार भोजराज भट्ट र पदम भण्डारीले सञ्चालनमा ल्याउन लागेको फर्निचर उद्योगमा दिउँसो १२ बजेको आसपास आगो सल्किको हो । उद्योगमा के कारणले आगलागी भयो भन्ने खुल्न नसकेको प्रहरीले जनाएको छ ।
उद्योग भएको स्थानमा बेल्डिङको काम भइरहेको र त्यहाँबाट निस्केको आगोको झिल्कोले आगलागी भएको हुन सक्ने प्रारम्भिक अनुमान गरिएको छ ।
२२ फागुन २०७७, शनिवार १७:२४ बजे प्रकाशित
