धनगढी। नेपाल कम्युनिस्ट पार्टी नेकपाले आगामी फागुनमा हुने प्रतिनिधि सभा सदस्य निर्वाचनका लागि सुदूरपश्चिम प्रदेशबाट उम्मेदवारहरूको नाम सिफारिस गरेको छ । प्रदेशका ९ वटै जिल्लाबाट केन्द्रमा पठाइएको सिफारिस सूची हेर्दा अधिकांश निर्वाचन क्षेत्रमा उम्मेदवार बन्न चाहने नेताहरूको भिड देखिएको छ ।

कैलाली, कञ्चनपुर, अछाम, डोटी लगायतका जिल्लामा एकै सिटका लागि कैयौँ नेता उम्मेदवार बन्न तम्सिएको परिस्थितिमा बाजुराबाट भने प्रकाश शाहको नाम सर्वसम्मत रूपमा एकल सिफारिस भएको छ

पार्टीको केन्द्रीय कार्यालयले पठाएको विशेष सर्कुलर अनुसार जिल्ला कमिटीहरूले उम्मेदवारको नाम टुङ्गो लगाउन बैठक डाकेका थिए । अन्य जिल्लामा सहमति जुट्न नसकेपछि आकाङ्क्षी सबैको नाम केन्द्रमा पठाइएको छ, तर बाजुरा जिल्ला कमिटीले भने प्रतिनिधि सभाको प्रत्यक्षतर्फका लागि प्रकाश शाहको नाममात्र सर्वसम्मत रूपमा सिफारिस गरेको हो । पार्टीभित्रको गुटबन्दी र आन्तरिक प्रतिस्पर्धालाई व्यवस्थापन गर्दै सिङ्गो जिल्ला कमिटीले उनलाई निर्विकल्प नेताका रूपमा स्वीकार गरेको हो ।

शाह बाजुरामा सर्वसम्मत हुँदा अन्य जिल्लामा भने पार्टीका शीर्ष नेताहरू नै टिकटका लागि अन्तरसंघर्षमा छन् । एमालेका पूर्वउपाध्यक्ष समेत रहेका डा भीम रावलको नाम तीन वटा निर्वाचन क्षेत्रबाट सिफारिस भएको छ । उनको गृहजिल्ला अछामको क्षेत्र नं १, कैलालीको क्षेत्र नं २ र क्षेत्र नं ५ बाटसमेत उनको नाम सिफारिस भएको छ ।

यस्तै सुदूरपश्चिमका पूर्वमुख्यमन्त्री त्रिलोचन भट्टको नाम डोटी र कैलाली क्षेत्र नं ५ गरी दुई ठाउँबाट सिफारिस भएको छ । कञ्चनपुर–१ बाट पूर्वमन्त्री बिना मगरसँगै जम्मा ८ जना आकाङ्क्षी लाइनमा छन् ।

कैलालीका ५ वटै क्षेत्रमा उम्मेदवार आकाङ्क्षीको लर्को छ । क्षेत्र नं १ मा हरि ज्ञवाली, भैरव रावल, सुरेन्द्र देवकर, प्रेम साउद लगायत ८ जनाको नाम सिफारिस गरिएको छ । यस्तै क्षेत्र नं २ मा डा। भीम रावल, लालबहादुर सोडारी, कर्णप्रसाद जैशी लगायत ६ जनाको नाम सिफारिस गरिएको छ । क्षेत्र नं ३ मा बिरमान चौधरी, लाजुराम चौधरी, विपिन आचार्य लगायत ८ जनाको नाम सिफारिस गरिएको छ ।

क्षेत्र नं ४मा दीर्घ सोडारी, कृष्णराज सुवेदी, हरिराम चौधरी, मिनराज बडु लगायत ९ जना र क्षेत्र नं ५ मा डा। भीम रावल, भानुभक्त जोशी, त्रिलोचन भट्ट, ओमप्रकाश पुन, सुशीला बुढाथोकी लगायत ११ जनाको नाम सिफारिस गरिएको हो।

अछामको क्षेत्र नं १ मा डा। भीम रावल पहिलो नम्बरमा सिफारिस भएका छन् । यद्यपि सो क्षेत्रमा कुलबहादुर कुँवर, लोकबहादुर बोहरा, शिवसुन्दर शाही लगायत ९ जनाको नाम सिफारिस गरिएको छ ।

यस्तै क्षेत्र नं २ मा शरद सिंह भण्डारी, भरतबहादुर साउद, रामप्रसाद तिमिल्सेना, शिवबहादुर बोगटी लगायत १० जनाको नाम सिफारिस गरिएको छ । कञ्चनपुरको क्षेत्र नं १ मा बिना मगर, लोकेन्द्र प्रसाद लम्साल, भक्तबहादुर अधिकारी लगायत ८ जना, क्षेत्र नं २ मा लालबहादुर खड्का, जयराज पाण्डेय, माधव प्रसाद पन्त लगायत ७ जना र क्षेत्र नं ३ मा मानबहादुर सुनार, हरक सिंह धामी, दिपक सिंह साउद लगायत ५ जनाको नाम सिफारिस गरिएको छ ।

यस्तै डोटीबाट पूर्वमुख्यमन्त्री त्रिलोचन भट्ट, हर्कबहादुर सिंह, जग विक, अन्जिता श्रेष्ठ, वीरबहादुर थापा लगायत ८ जना सिफारिस भएका छन् । डडेल्धुरामा नेकपाबाट मानसिंह माल, अम्बरबहादुर बोहरा, निरादेवी जैरु र मुकुन्द प्रसाद भट्ट गरी ४ जना सिफारिस भएका छन् । बैतडीबाट नरेन्द्रबहादुर कुँवर विजयसुन्दर र परमानन्द भट्ट गरी २ जनाको नाममात्र सिफारिस भएको छ ।

यस्तै दार्चुलाबाट लक्ष्मण दत्त जोशी, ललित सिंह ठगुन्ना, मदन सिंह धामी, नरबहादुर विष्ट र गंगाकुमारी महरा गरी ५ जना सिफारिसमा परेका छन् । कैलाली र अछामजस्ता जिल्लामा देखिएको आकांक्षीहरूको लामो सूचीले केन्द्रलाई उम्मेदवार छनोट गर्न निकै सकस पर्ने देखिन्छ ।

२८ पुस २०८२, सोमवार १०:१५ बजे प्रकाशित