कैलाली । नेकपा एमाले सम्बद्ध राष्ट्रिय युवा संघ नेपाल कैलालीको जिल्ला अधिवेशन आज हुने भएको छ। कैलालीको घोडाघोडी नगरपालिका १ सुखडमा हुन लागेको नवौँ अधिवेशनले नयाँ नेतृत्व चयन गर्ने जनाइएको छ ।

अधिवेशनको सम्पूर्ण तयारी पुरा भइसकेको राष्ट्रिय युवा संघ कैलालीका इन्चार्ज अरुण कुवरले जानकारी दिए । उनले अधिवेशन उद्घाटन गर्न एमालेका नेताहरू कैलाली पुगिसकेको बताए ।

आज ११ बजे सुखड बजारको हेलिप्याडमा एमाले केन्द्रीय सचिव लेखराज भट्टले अधिवेशनको उद्घाटन गर्ने छन् । कार्यक्रममा विशिष्ट अतिथि एमाले पोलिट व्युरो सदस्य तथा राष्ट्रिय युवा संघ नेपालका इन्चार्ज महेश बस्नेत रहने छन् ।

राष्ट्रिय युवा संघ नेपालका केन्द्रीय अध्यक्ष किरण बस्नेत, पूर्व केन्द्रीय अध्यक्षहरू तथा पार्टीका नेताहरू पनि अधिवेशनका लागि आइसकेका छन् ।

कैलाली जिल्ला अधिवेशन सुदूरपश्चिमकै भव्य अधिवेशन बनाउने तयारी भइरहेको इन्चार्ज कुवरले जानकारी दिए ।

‘हामी सबै भव्य रुपमा सम्पन्न गर्न लागिरहेका छौँ केन्द्रीय नेताहरू पनि पुगिसक्नु भएको छ’ उनले भने ‘कैलालीको अधिवेशन नेपालकै भव्य अधिवेशनहरू मध्ये बनाउने तयारीमा छौ ।’