नेपाली कांग्रेस बझाङले सत्तारुढ दल नेकपा एकीकृत समाजवादीसंग चुनावी गठबन्धन नगर्ने निर्णय गरेको छ। नेपाली कांग्रेस जिल्ला कार्य समिति बझाङले विज्ञप्ती जारी गर्दै नेकपा एकीकृत समाजवादीसंग मित्रवत स्वच्छ प्रतिस्पर्धा गर्ने जनाएको छ। सत्तारुढ नेकपा माओवादी केन्द्रसंग भने गठबन्धन गरेर चुनावमा जाने कांग्रेस बझाङका सभापति खडक बहादुर बोहराले बताए। बझाङ एकीकृत समाजवादीका नेता भानुभक्त जोशीको गृहजिल्ला समेत हो।

आसन्न प्रतिनिधि सभा निर्वाचनमा जोशी बझाङबाट प्रत्यक्षतर्फ चुनाव लड्ने तयारीमा छन् । सोही अनुरुप गठबन्धनमा समाजवादीले बझाङमा सशक्त दाबी प्रस्तुत गरिरहेको छ। ‘बझाङ जिल्लाका कांग्रेसजनबाट प्राप्त सुझावलाई मध्यनजर गर्दै कांग्रेसले माओवादीसंग गठबन्धनका साथ अगाडि बढ्ने र समाजवादीसंग मित्रवत स्वच्छ प्रतिस्पर्धाका आधारमा निर्वाचनमा जाने जानकारी गराइन्छ ।’

जिल्ला सभापति बोहराद्धारा हस्ताक्षरित विज्ञप्तीमा भनिएको छ। बझाङमा जनमतको हिसाबले कांग्रेस पहिलो, माओवादी दोस्रो र समाजवादी तेस्रोत न्यून स्थानमा रहेको कांग्रेसको दाबी छ। नेपाली कांग्रेस गठबन्धन विरोधी नभएको समेत कांग्रेसले विज्ञप्तीमार्फत स्पष्ट पारेको छ। स्थानीय तह निर्वाचनमा रहेको तीन दलीय गठबन्धनबाट निर्वाचित केही जनप्रतिनिधिहरुको कार्यशैलि गठबन्धन विरोधी रहेको समेत कांग्रेसले आरोप लगाएको छ।

४ असोज २०७९, मंगलवार १०:०० बजे प्रकाशित