सुदूरपश्चिम प्रदेशका मुख्यमन्त्री त्रिलोचन भट्टले संविधानले परिकल्पना गरेको संघीय लोकतान्त्रिक गणतन्त्र, सामाजवाद उन्मुख अर्थतन्त्रलगायतको संस्थागत विकास गर्न प्रदेश सरकार लागिरहेको बताएका छन्।

संविधान दिवसको शुभकामना दिँदै उनले संविधानको पूर्ण कार्यान्वयनमार्फत संघीय लोकतन्त्रको संस्थागत विकास, राष्ट्रियताको रक्षा, प्रदेशको समग्र विकास गर्ने तर्फ मन, बचन र कर्मले समर्पित हुन आग्रह गरेका छन्।

यस्तै, ऐन कानुनहरुलाई जनताको मर्म र भावना अनुसार घर आँगनमै अधिकार प्रत्याभूत गर्ने कार्यमा प्रदेश सरकार लागेको बताए। उनले सुदूरपश्चिम प्रदेशको विशिष्ट भौगोलिक र सामाजिक विषेशतासहितको योजना र कार्यक्रम अगाडि सार्दै जनताको समृद्धि र समुन्नतिप्रतिको अभिलाषा पूरा गर्न प्रदेश सरकार प्रतिवद्ध रहेको बताएका छन्।

समाजमा व्याप्त वर्गीय असमानता, जातीय विभेद, बेरोजगारी, कुरीति र कुसंस्कारलाई निर्मुल पारेर मात्र संविधानले परिलक्षित गरेको गन्तव्यमा पुग्न सकिने उनको भनाइ रहेको छ।

मुख्यमन्त्री भट्टले लोकतान्त्रिक गणतन्त्र स्थापनाका लागि सशस्त्र संघर्ष तथा जनआन्दोलन लगायतमा सहादत प्राप्त गर्ने सम्पूर्ण ज्ञात अज्ञात सहिदप्रति श्रद्धासुमन अर्पणका साथै बेपत्ता नागरिक तथा घाइते योद्धाहरुप्रति उच्च सम्मान प्रकट गरेका छन्।

३ असोज २०७८, आइतवार ०९:२४ बजे प्रकाशित