कैलालीका निजी अस्पताल पनि कोरोना वार्ड सञ्चालन गर्न तयार भएका छन् । कोरोना संक्रमण बढेपछि प्रदेश सरकारको आग्रहमा यहाँका निजी अस्पतालहरु संक्रमितको उपचारका लागि कोरोना वार्ड सञ्चालन गर्न सहमत भएका हुन् ।

प्रदेश निजी अस्पतालले ५ देखि १० बेडसम्मको वार्ड सञ्चालनका लागि प्रदेश सरकाससंग सहमति भएको निजी अस्पताल संघ सुदूरपश्चिम प्रदेश (अफिन)का अध्यक्ष जनकराज जोशीले जानकारी दिए ।

उनकाअनुसार धनगढीका नवजीवन अस्पताल र अत्तरियाको पदमा अस्पताल १०÷१० बेडको कोरोना वार्ड सञ्चालन गर्ने भएका छन् । त्यस्तै, धनगढीको माया मेट्रो अस्पताल, कैलाली अस्पताल, निसर्ग अस्पताल, सीपी अस्पताल, नोभा अस्पताल, सारथी अस्पताल, केजी अस्पताल र ओम आशा अस्पतालले ५÷५ बेडको वार्ड सञ्चालन गर्ने भएका छन् ।

वार्ड सञ्चालन शुक्रबारदेखिनै सुरु गरिने अध्यक्ष जोशीले बताए । सुदूरपश्चिमका दुई ठूलो सरकारी अस्पताल सेती प्रादेशिक अस्पताल र महाकाली अस्पताल संक्रमितले भरिभराउ भएपछि प्रदेश सरकारले निजी अस्पतालसंग सहकार्य गरेको हो ।

निजी अस्पतालमा हुने खर्च भने सरकारले व्यहोर्ने सामाजिक विकास मन्त्रालयका प्रवक्ता नरेन्द्र कार्कीले जानकारी दिए । उनकाअनुसार सामान्य प्रकृतिको बिरामीको दैनिक प्रतिबिरामी ३ हजार ५ सय लाग्नेछ भने जटिल लक्षण भएका विरामीको ७ हजारदेखि १५ हजारसम्म तोकिएको छ । सो रकम प्रदेश सरकारले निजी अस्पताललाई उपलब्ध गराउनेछ ।

१७ वैशाख २०७८, शुक्रवार १५:२५ बजे प्रकाशित