राष्ट्रिय मानव अधिकार आयोगले कैलालीको धनगढीमा अनसनरत लक्ष्मण थारूको स्वास्थ्य अवस्थाप्रति संवेनदशील हुन आग्रह गरेको छ ।

बुधबार विज्ञप्ति जारी गरी आयोगले संविधान संशोधनलगायतका माग राखेर फागुन १ देखि आमरण अनसनमा रहेका थारुवान राष्ट्रिय मोर्चाका नेता लक्ष्मण थारूको स्वास्थ्य अवस्था गम्भीर भएकाले जीवन रक्षाको पहल गर्न आग्रह गरेको छ ।

अनसनका कारण थारुको रक्तचापमा अस्थिरता देखिएको, टाउको दुख्ने, ढाड दुख्ने एवम् स्वास्थ्य अवस्था कमजोर हुँदै गएकाले धनगढीस्थित सेती प्रादेशिक अस्पतालको सघन कक्षमा उपचार भइरहेको छ ।

थारूको स्वास्थ्य अवस्थाप्रति संवेदनशील भई उनको मागका सम्बन्धमा आवश्यक छलफल र संवाद गरी निष्कर्षमा पुग्न तथा जीवन रक्षाको लागि पहल गर्न आयोगले सरकारको ध्यानाकर्षण गराएको छ ।

‘आपसी विमतिका विषयलाई वार्ता र संवादको माध्यमबाटै समाधान खोज्न तथा कुनै पनि समस्या समाधानको लागि आमरण अनसन जस्तो कठीन बाटो नरोज्न समेत आयोग सम्बन्धित पक्षलाई आग्रह गर्दछ’ आयोगका प्रवक्ता वेद भट्टराईद्वारा जारी विज्ञप्तिमा भनिएको छ ।आयोगको सुदूरपश्चिम कार्यालय धनगढीको टोलीले थारुको स्वास्थ्य अवस्थाको अनुगमन गरेको थियो ।

८ फागुन २०७६, बिहीवार ०१:५७ बजे प्रकाशित