एजेन्सी । बिहे भएको २४ घण्टा बित्न नपाउँदै एक युवतीको सिउँदो पुछिएको छ ।

भारतको उत्तर प्रदेश राज्यको मैनपुरीमा २० वर्षीय सोनु यादव मंगलबार विवाहका लागि जन्तीसहित औरैया जिल्लाको सुल्तानपुरस्थित बेहुलीको घरमा पुगे ।

विवाहका प्रक्रिया पूरा गरी बुधबार बेहुली लिएर सोनु आफ्नो घर फर्किए । प्रचलित विधि अनुसार बेहुली भित्र्याइयो । विवाहका लागि घरमा आएका पाहुना बिहीबार आ–आफ्नो घर फर्कन थाले ।

पाहुनाहरूलाई बिदा गरेर सोनु आरामका लागि पहिलो तलामा गए । त्यहाँ रहेको सोफामै उनी सुते । लामो समयसम्म पनि नउठेपछि उनलाई आमाले बोलाइन् । तर उनी बोलेनन् । आत्तिएर आमाले हल्लाखल्ला गरिन् ।

अचेत अवस्थामा रहेका उनलाई नजिकैको अस्पतालमा लगियो । तर चिकित्सकले उनलाई मृत घोषणा गरे । उनको मृत्युको कारण पहिचान भइसकेको छैन । प्रहरीले शव परीक्षणका लागि पठाएको भारतीय सञ्चारमाध्यमले जनाएका छन् ।

२८ असार २०८१, शुक्रवार १५:२३ बजे प्रकाशित