सुदूरपश्चिम प्रदेशका आठ जिल्लामा नेकपा एमालेको जिल्ला अधिवेशन सम्पन्न भएको छ। नौ जिल्ला रहेका यस प्रदेशमा बझाङ बाहेकका बाँकी ८ जिल्लामा अधिवेशन सम्पन्न भएको हो।

कैलाली, कञ्चनपुर, अछाम र दार्चुलामा निर्वाचन प्रक्रियाबाट तथा डडेल्धुरा, बैतडी, डोटी र बाजुरामा सर्वसम्मत रुपले नेतृत्व चयन भएको एमाले सुदूरपश्चिम प्रदेश कमिटीले जनाएको छ।

जिल्ला अधिवेशन सम्पन्न भएसँगै ८ जिल्लाले नयाँ नेतृत्व पाएको एमाले सुदूरपश्चिम प्रदेश कमिटीका अध्यक्ष दामोदर भण्डारीले बताए।

बैतडीमा सुरेन्द्र पाल, डडेल्धुरामा प्रकाश साउद, डोटीमा चक्र मल्ल र बाजुरामा कालीप्रसाद शाही जिल्ला अध्यक्षका रुपमा चयन भएका छन्।

यस्तै, कैलालीमा रतन थापा, कञ्चनपुरमा सुरेन्द्र विष्ट, अछाममा चन्द्र बोहरा र दार्चुलामा प्रेम सिंह धामी निर्वाचित भएका हुन्।

बझाङमा भने मौसम खराबका कारण निर्वाचन हुन सकेको छैन। कोरोना संक्रमण बढ्दै गएकाले उपयुक्त समय हेरी बझाङको अधिवेशन सम्पन्न गरिने एमालेले जनाएको छ।

१ माघ २०७८, शनिवार १२:१९ बजे प्रकाशित