धनगढी । राष्ट्रिय धान दिवस मनाउँदै गर्दा सुदूरपश्चिम प्रदेशमा ५० प्रतिशत रोपाइँ सम्पन्न भएको छ ।

चालु वर्षमा समयमै मनसुन भएका कारण असार १५ गतेसम्म प्रदेशका ९ वटै जिल्लामा ५० प्रतिशत रोपाइँ सम्पन्न भएको कृषि निर्देशनालयले जनाएको छ ।

प्रदेश कृषि निर्देशनालय दिपायलका कृषि निर्देशक वरिष्ठ कृषि विकास अधिकृत यज्ञराज जोशीले मंगलबारसम्म ५० प्रतिशत रोपाइँ सकिएको जानकारी दिए ।

‘सुदूरपश्चिममा एक लाख ८५ हजार हेक्टर क्षेत्रफलमा धान रोपाइँ गरिँदै आएको छ’ वरिष्ठ कृषि विकास अधिकृत जोशीले भने, ‘मंगलबारसम्म आइपुग्दा करीब ५० प्रतिशत रोपाइँ सम्पन्न भएको छ ।’

जोशीले यसवर्ष समयमै मनसुन भएका कारण अघिल्ला वर्षको तुलनामा धेरै रोपाइँ सकिएको बताए । ‘गत वर्ष अहिले ३०-३२ प्रतिशत मात्र रोपाइँ भएको थियो ।

यसवर्ष प्रशस्त मात्रामा प्राकृतिक मनसुन भएका कारण किसानले समयमै धान रोप्न पाएका छन्’ उनले भने, ‘किसानहरुमा जनचेतना वृद्धि हुनु र प्रदेश सरकार, संघीय सरकार र स्थानीय सरकारले सिँचाइ सुविधा विस्तार गर्नाले पनि रोपाइँ समयमै भएको देखिन्छ ।’

सुदूरपश्चिम प्रदेशमा धान रोपाइँ हुने कुल क्षेत्रमध्ये करीब ५३ प्रतिशत क्षेत्रमा मात्र सिँचाइ सुविधा पुगेको कृषि निर्देशनालयले जनाएको छ । बाँकी ४७ प्रतिशत क्षेत्रफलमा आकाशे पानिको भरमा रोपाइँ गरिदै आएको छ ।

१५ असार २०७८, मंगलवार ११:२३ बजे प्रकाशित