धनगढी । कैलाली भन्सार कार्यालय धनगढीले दुई महिनामा रु. एक अर्ब दुई करोड ९० लाख राजस्व संकलन गरेको छ ।

कार्यालयले चालु आर्थिक वर्ष २०८३/८४ को साउन र भदौ महिनामा उक्त परिमाणको राजस्व संकलन गरेको हो ।

भन्सार कार्यालयका सूचना अधिकारी प्रकाश तिमिल्सिनाका अनुसार कार्यालयले साउनमा रु ४९ करोड २४ लाख र भदौमा रु ५३ करोड ६५ लाख राजस्व संकलन गरेको छ ।

गत आव २०८२/८३ को साउन र भदौ महिनामा कार्यालयले रु एक अर्ब ११ करोड ५० लाख राजस्व संकलन गरेको थियो । गत आवको तुलनामा यस वर्षका दुई महिनामा राजस्व संकलन घटेको देखिन्छ ।

कार्यालयले चालु आवका साउन र भदौ दुबै महिनामा लक्ष्यअनुसारको राजस्व संकलन गर्न सकेको छैन् । कार्यालयको चालु आवको साउनमा रु ७२ करोड ५८ लाख राजस्व संकलनको लक्ष्य रहेकामा संकलन भएको राजस्व लक्ष्यको ६७ दशमलव ८४ प्रतिशत मात्रै रहेको सूचना अधिकारी प्रकाश तिमिल्सिनाले जानकारी दिए ।

त्यस्तै,भदौ महिनामा कार्यालयको रु ८२ करोड ९५ लाख राजस्व संकलनको लक्ष्य रहेकामा लक्ष्यको ६४ दशमलव ६८ प्रतिशत मात्रै राजस्व संकलन भएको भन्सार कार्यालयले जनाएको छ ।

कार्यालयको चालु आवमा रु १० अर्ब ३६ करोड ९४ लाख राजस्व संकलनको वार्षिक लक्ष्य रहेकामा दुई महिनामा संकलन भएको राजस्व वार्षिक लक्ष्यको नौ दशमलव ९२ प्रतिशत रहेको भन्सार कार्यालयले जनाएको छ ।

गत आर्थिक वर्ष २०८२/८३ मा कार्यालयले रु आठ अर्ब ३९ करोड ८५ लाख राजस्व संकलन गरेको थियो । गत आवमा रु.नौ अर्ब ७१ करोड १५ लाख राजस्व सङ्कलन गर्ने कार्यालयको वार्षिक लक्ष्य रहेकामा लक्ष्यको ८६ दशमलव ४८ प्रतिशत मात्रै राजस्व संकलन भएको कैलाली भन्सार कार्यालयले जनाएको छ ।

१३ असोज २०८३, मंगलवार ११:५४ बजे प्रकाशित