Hotel Flora Long Ad

मेघाकी युकीलाई ‘नइ देरुनीखपू कोपिला पुरस्कार’ प्रदान गरिने

यस वर्षको ‘नइ देरुनीखपू कोपिला पुरस्कार’ बाल नृत्यांगना युकी कुँवरले पाउने भएकी छन् ।

नइ प्रकाशनले दस वर्ष ननाघेका बालबालिकालाई प्रदान गर्दै आएको यो पुरस्कार यस वर्ष युकी र समीर डङ्गोलले पाउने भएका हुन् । समीरलाई सङ्गीत र युकीलाई नृत्यतर्फ यो पुरस्कार दिइने नइ प्रकाशनले आफ्नो वेबसाईटमार्फत जनाएको छ ।

ताम्रपत्रसहितका यी दुवै पुरस्कार जनही सात हजार रुपियाँ राशिका हुन् । काठमाडौंको अनामनगरस्थित मेघा स्कुलमा कक्षा २ मा अध्ययनरत युकीले तीन वर्षको उमेरदेखि नै विभिन्न स्टेज कार्यक्रमहरूमा नृत्य गर्दै आएको उनको परिवारले जनाएको छ ।

यस्तै नइ प्रकाशनले पन्ध्र वर्ष ननाघेका अन्य आठजना बालबालिकालाई २०७७ सालको नइ बाल पुरस्कार समर्पण गर्ने घोषणा गरेको छ । नइ प्रकाशनले सोइना दाहाललाई ‘नइ देरुनीखपू बाल बहुआयामिक पुरस्कार’ समर्पण गर्ने निर्णय गरेको छ ।

त्यसै गरी साहित्यतर्फ सुविन रिमाल, चित्रकलातर्फ देभान्स अग्रवाल, सङ्गीततर्फ सफलता श्रेष्ठ, नृत्यतर्फ अदिति उपाध्याय र खेलकुदतर्फ ऋषान्त घिमिरेलाई ‘नइ देरुनीखपू बाल पुरस्कार’ समर्पण गरिने भएको छ ।

यी सबै पुरस्कार ताम्रपत्रका साथै जनही दस हजार रुपियाँ राशिका रहेको नइ प्रकाशनले जनाएको छ । त्यसै गरी पाँच वर्षीया दृश्ना महर्जनलाई ताम्रपत्रका साथै पाँच हजार रुपियाँ राशिको ‘नइ देरुनीखपू चिचिला पुरस्कार’ समर्पण गरिने भएको छ ।

नइ प्रकाशनका अध्यक्ष इन्दिरा प्रसाईको अध्यक्षतामा आज बसेको नइ प्रकाशनको बैठकले सो निर्णय गरेको सदस्य सचीव नरेन्द्रराज प्रसाईले जानकारी दिए ।


१३ वैशाख २०७८, सोमवार १९:३३ बजे प्रकाशित

Dhangadi Corona

प्रतिक्रिया दिनुहोस्

सम्बन्धित शीर्षकहरु