विश्व स्वास्थ्य संगठन (डब्लुएचओ) ले कोभिड–१९ अर्थात नोवेल कोरोना भाइरसको संक्रमण अझै बिस्तार हुने सम्भावना रहेको भन्दै त्यसविरुद्ध लड्नका लागि तयारी अवस्थामा रहन आग्रह गरेको छ ।

कोभिड–१९ को सम्भावित महामारीका लागि विश्वका सबै देश थप तयारी अवस्थामा रहनु पर्ने डब्लुएचओले बताएको हो । अहिले नै कोभिड–१९ भाइरसको संक्रमणलाई विश्वव्यापी महामारी भन्ने अवस्था नरहेको तर देशहरु सम्भावित महामारीका लागि तयारी अवस्था रहनु पर्ने डब्लुएचओले उल्लेख गरेको छ ।

विश्वका धेरै क्षेत्रमा संक्रमण सहज रुपमा एक व्यक्तिबाट अर्कोमा सर्न थालेपछिको अवस्थालाई विश्वव्यापी महामारी भन्ने गरिन्छ । चीनबाट सुरु भएको कोभिड–१९ को संक्रमण दक्षिण कोरिया, इटाली तथा इरानमा पनि धेरै मानिसमा देखिएपछि चिन्ता बढेको हो ।

अहिलेसम्म चीनमा ७७ हजार भन्दा बढी मानिसमा संक्रमण पुष्टि भएको छ । यसका कारण झण्डै २६ सय जनाको मृत्यु भएको छ ।

नयाँ संक्रमणको दर भने चीनमा कम हुँदै गएको छ । चीनबाहिर ३० देशमा १२ सय भन्दा बढी मानिसमा कोभिड–१९ को संक्रमण भएको छ । चीन बाहिर कम्तिमा २० जनाको मृत्यु भएको छ ।

१३ फागुन २०७६, मंगलवार ०३:४६ बजे प्रकाशित