कैलाली। सुदूरपश्चिम प्रदेशमा गत आर्थिक वर्षमा सवारी साधन दर्ता तथा सवारी चालक अनुमतिपत्र वितरणको तथ्यांकले प्रदेशमा सवारी साधनको प्रयोग तीव्र गतिमा बढ्दो अवस्थामा रहेको संकेत गरेको छ।

विशेषतः मोटरसाइकलको संख्यामा आएको तीव्र वृद्धिले जनसांख्यिक र पूर्वाधारगत परिवर्तनोंको संकेत गरेको देखिन्छ।धनगढीस्थित यातायात व्यवस्था कार्यालयमा मात्र आठ हजारभन्दा बढी मोटरसाइकल दर्ता हुनु कैलाली जिल्लाको आर्थिक क्रियाशीलता, यातायातमा निर्भरता तथा शहरीकरणसँग गाँसिएको जनसंख्या वृद्धिको परिचायक हो।

कञ्चनपुरमा पनि एक हजार सात सयभन्दा बढी मोटरसाइकलको दर्ता हुनु यहाँको सहर विस्तार र ग्रामीण क्षेत्रहरूमा मोटरसाइकललाई आवागमनको मुख्य माध्यमका रूपमा प्रयोग गरिन थालेको देखाउँछ।यसबाहेक डोटी र डडेल्धुरा जस्ता पहाडी जिल्लाहरूमा पनि सवारी साधनको दर्ता देखिनु विकासका गतिविधिहरू क्रमशः ती क्षेत्रसम्म फैलिन थालेको सूचक हो।

यद्यपि, तुलनात्मक रूपमा यी जिल्लाहरूमा संख्या कम हुनु पूर्वाधार, आयस्तर तथा भूगोलजन्य कठिनाइका कारण देखिन्छ।पछिल्लो तथ्यांकअनुसार, एक वर्षको अवधिमा करिब १४ हजार ७३२ वटा सवारी साधन दर्ता भएका छन् भने दुई लाखभन्दा बढी सवारी साधन अहिलेसम्म प्रदेशभरि दर्ता भइसकेका छन्।

सवारी चालक अनुमतिपत्र लिनेको संख्या १८ हजार नाघेको छ भने नविकरण गराएकाहरूको संख्या झनै बढी छ, जसले सवारी साधनको नियमितिकरणप्रति जनचासो र सरकारी सेवा उपयोगमा बृद्धि देखाउँछ।यो अवस्था हेर्दा सुदूरपश्चिम प्रदेशमा मोटरसाइकल र अन्य सवारी साधनहरूको उपयोग तीव्र गतिमा बढिरहेको छ। आगामी दिनमा सवारी चापसँगै सडक सुरक्षा, पार्किङ सुविधा, ट्राफिक व्यवस्थापन र सार्वजनिक यातायातको प्रभावकारी विस्तार चुनौती र प्राथमिकताका रूपमा देखापर्ने सम्भावना बलियो छ।

२२ साउन २०८२, बिहीवार ११:३७ बजे प्रकाशित