धनगढी। नेकपा एमालेका  केन्द्रिय सदस्य झपट रावलले भीम रावललाई पार्टीबाट निष्कासन गर्ने केन्द्रीय सचिवालयको निर्णय सच्याउनुको विकल्प नरहेको बताएका छन्  । पार्टीबाट निष्कासन गरिएपछि केन्द्रिय सदस्य रावलले भनेका छन, ‘हिजोका दिनमा अध्यक्षले नै पार्टीभित्र आन्तरिक लोकतन्त्रको अभ्यासको नीति अगाडि सार्नुभो, अभ्यास पनि भयो। तर, आज उहाँले नै अध्यक्षमा लडेकै कारण भीम रावललाई जिम्मेवारीविहीन बनाउनुभयो र अन्ततः पार्टीविहीन बनाएर निकाल्नुभो।

त्यसैले यो गम्भीर र दुःखद निर्णय हो। उहाँमाथिको कारबाही आन्तरिक लोकतन्त्रको हिसाबले बेठिक छ। यसले सुदूरपश्चिममा मात्र होइन, देशभरि ठुलो क्षति पुग्न सक्छ। उहाँ पार्टी नछाड्ने पक्षमा हुनुहुन्थ्यो, हामीले पनि त्यही आग्रह गरिरह्यौँ। तर, पार्टीबाटै निकालेपछि अब उहाँसामु धेरै विकल्प छैनन्।’

त्यसैले पार्टीले निर्णय सच्याउनेबाहेक अरू कुनै विकल्प नभएको पार्टीका केन्द्रिय सदस्य  रावलले बताए। मलाई भीम रावलमाथिको कारबाहीभन्दा पनि पार्टीभित्र आन्तरिक लोकतन्त्रको वकालत गर्ने अध्यक्षले नै यस्तो अप्रिय निर्णय सच्याउनुभएन भने जीवनको उत्तराद्र्धमा मात्र होइन, इतिहासले उहाँमाथि अन्यथा मूल्यांकन गर्ला कि भन्नेचाहिँ ठुलो चिन्ता छ। हामीले विचार नमिल्नेहरूलाई त पार्टी बलियो बनाउने भन्दै भित्र्याइरहेका छौँ भने रावललाई निकाल्दा विरोधीले के आरोप लगाउँछन्?

१२ पुस २०८१, शुक्रवार १४:२७ बजे प्रकाशित