Hotel Flora Long Ad

बैतडीमा एक वर्षमा साढे ५ हजारले बनाए नागरिकता

बैतडीमा एक वर्षको अवधिमा साढे ५ हजार जनाले नेपाली नागरिकताको प्रमाणपत्र बनाएका छन्।

जिल्ला प्रशासन कार्यालयका अनुसार गत आर्थिक वर्ष २०७७र०७८ मा ५ हजार ५ सय ६४ जनाले नागरिकता बनाएका हुन्। जसमा ३ हजार ३ सय ५८ पुरुष र २ हजार २ सय ६ महिला रहेको जिल्ला प्रशासन कार्यालय बैतडीका सूचना अधिकारी खगेन्द्र भारतीले जानकारी दिए।

कोरोना महामारीका कारण विभिन्न समयमा कार्यालय बन्द रहे पनि उक्त संख्यामा नागरिकले नयाँ नागरिकता लिएका हुन्। गत आर्थिक वर्षको कात्तिकमा सबैभन्दा बढी र भदौ महिनामा सबैभन्दा कम नागरिकताको प्रमाणपत्र वितरण भएका प्रशासनले जनाएको छ।

यस्तै ४ जनाले वैवाहिक अंगीकृत नागरिकताको प्रमाणपत्र लिएका छन् भने १ हजार ८ सय १८ जनाले नागरिकताको प्रतिलिपि लिएका छन्। प्रतिलिपि लिनेमा १ हजार ३ सय ७६ जना पुरुष छन् भने ४ सय ४२ जना महिला रहेका छन्।

यस्तै ६ जनाले नेपाली नागरिकताको प्रमाणपत्र परित्याग गरेका छन्। अन्य देशको नागरिकता प्राप्त गरेका ६ जनाले नेपाली नागरिकताको प्रमाणपत्र परित्याग गरेका हुन्।

यसैबीच नागरिकतासम्बन्धी ४ सय ८० वटा गुनासा आएकोमा ३ सय ५३ वटा फर्स्यौट भएका र १० वटा प्रक्रियामा छन्। नागरिकतासम्बन्धी आएका १७ वटा गुनासा भने खारेज भएका जिल्ला प्रशासन कार्यालय बैतडीले जनाएको छ।


६ साउन २०७८, बुधवार १७:५४ बजे प्रकाशित

Dhangadi Corona

प्रतिक्रिया दिनुहोस्

सम्बन्धित शीर्षकहरु